Llevo tiempu oyendo falar de ‘marketing llingüísticu’ y nun sé si esti anunciu de Carlsberg va nesi sen… pero la verdá ye que ye l’amuesa de cómo una llingua minoritaria cómo’l gaélicu irlandés val pa vender. A lo menos, asina lo piensa una de les mayores multinacionales de la cerveza.
Cierto ye que l’irlandés ye llingua oficial, pero eso nun quita pa que tea amenorgada énte la puxanza, nada menos, del inglés. Entá ye vista por muncha xente como daqué que val namás pa falar na casa, cola familia o los collacios, o nin eso. De fechu, ye más fácil sentir asturianu na cai Uría que gaélicu en O’Connell Street. Pero la percepción ye lo que cuenta… y la mayoría d’irlandeses entienden ensin problemes la broma del anunciu… un anunciu que ye pa vender, pa qu’una empresa faiga dineru.
Nun va munchu lleí cómo la creación de la primer canal de televisión dafechu en gaélicu (TG4), en 2005, foi criticada por grandes firmes de la prensa irlandesa como un gastu ablucante y innecesariu. Güei caltién unos índices d’audiencia d’ente’l 3 y el 4% y fai por caltener viva la llingua materna de 350.000 irlandeses, pero que conocen 1,9 millones de los 4,4 millones d’habitantes de la islla.
Relixosamente, ayeri tuviemos nel actu convocáu pola Academia. Había que tar ellí, y tuvo bien amosar el compromisu de bona parte de la sociedá asturiana pa cola so llingua. Prestónos ver de cerca a la coraxuda presidenta y a toa una Academia de la que, cuidamos dende equí, tenemos que sentir argullu pol papel que quier y merez xugar. Tamién prestónos enforma la intervención última, la de Xosé Nel Riesgo, que munchos firmaríemos como propia. Pero decepcionónos una migayina l’actu en sí.
Nun sé si taréis d’alcuerdu en que foi llargu, pelma… dacuando paecía una sesión de terapia de grupu del tipo (Hola, soi Fulanín Fernandi y soi llinguólicu… ¡¡Hola fulanin!!…). Amás, nun sabemos si hebo dalguna persona esmolecida pol tratu a la prensa, pero diónos la impresión de que non. De fechu, la única anuncia ‘nueva’ que se fexo na ceremonia (la de la carta a ZP y Rajoy) nun se fizo pública hasta l’ultimu momentu, cuando nun quedaba ya naide de los medios de comunicación presente. Namás l’interés d’un redactor d’axencia (qu’esperó bien de tiempu hasta que se-y echó encima la hora de cierre) fizo que, per teléfonu, s’enterara del ‘titular’.
Pero en fin, sacantes d’eso, verdá ye que prestó tar ellí, y que hai que siguir… como dixo Riesgo, hai que facese visibles, enllenar l’alministración de trámites n’asturianu, salir del armariu y amosar que, de verdá, polo menos una parte importante de la sociedá asturiana ta pidiendo respetu y que se-y reconoza un derechu que ye suyu.
La $GA€ demanda a Público pola so llinia editorial, contraria a les práctiques de la sociedá xestora, y tamién por pemitir a los usuarios de la so web espublizar comentarios llibremente que, pa la entida xestora, son ofensivos.
Toos conocemos la forma d’actuar de la SGAE (lluéu lloren porque tienen mala imaxe), pero lo que ta asustandome ye la normalidá cola que se ve a la censura. Y yá nun falo de los intentos de la SGAE por zarrar la boca a toles voces molestes, sinon que fai unos años zarrose Egin al pocu zarren tamien Egunkaria. Equí nun pasaba nada porque yeren radicalones vascos que queríen acabar coles “llibertaes democrátiques” d’ESPAÑA (pronunciai bien fuerte)… Coimes pero si lleemos la Constitución Española, nel artículu 20 fala d’un derechu democráticu… llibertá d’espresión o algo así…
Fai mui pocu toco-y a los republicanos, y secuestren la famosa portada del Jueves…
Nun voi falar ya del servilismu políticu de los medios de comunicación n’Asturies… de Radio Sele… de TeleAsturias… de la COPE en Catalunya… de TeleK en Vallecas… etc… etc… pero ye que toi mui asustáu de la normalidá que va garrando lo de “censurar lo que nun mos presta”…
A dalgunos paez que nun-yos prestó demasiao que seya precisamente el blogue L’Asturies lliberal el que diera anuncia de los preparativos pala creación d’un diariu n’asturianu. Pero pa mín ye lo meyor que-y podía pasar al asturianu, seya quien seya’l promotor.
Lo que ta claro, ye que nun van plantease una aventura asina dende la fantasía. Cuido que nun sedrá’l so enfotu arrequexar a tol asturianismu que nun seya de ‘centru’, nin fadrán un periódicu nel que Tini nun salga namás que con cuernos y goliendo a azufre. Espero que, si cuaya, seya un periódicu que nun fieda namás ver la portada, que se pueda lleer ensin sentir vergoña…
El casu ye que, nuna de les reacciones xeneraes pola noticia, Trasgu duldaba de la viabilidá del proyeutu. Y nun ye malo mirar pa otros llugares y ver qué hai perhí.
37018
Cataluña ye, cómo no, motivu de sana envidia. Ellí, amás del Avui, atopes la edición en catalán de El Periódicu de Cataluña asina como los comarcales o provinciales el Segre, El Punt de Girona, El 9 nou, el Regiò 7… En Baleares editen el Diari de Balears, en Galicia el Galicia Hoxe (antiguo Correo Galego) y en Euskadi el Berria. Si nun m’equivoco, esos son tolos diarios en llingües minoritaries del estáu español.
La situación de caún d’ellos ye bien estremada, tanto pol so tamañu como empresa, como pola situación económica. Avui vendióse va unos años y pasó per un mal momentu porque la so estructura yera la de un diariu de los de tola vida. A la fin, integróse nun grupu editorial potente (ta participáu pol Grupu Godó, de La Vanguardia y por Planeta, de La Razón). Llámenlu sinerxa, y fai que la cabecera aguante bien.
El Periódico de Cataluña, edición en catalán, y el Periodic d’Andorra, son cabeceres en catalán del Grupo Zeta (La Voz de Asturias). Cabeceres saludables (l’asturiana non, les catalanes), anque nun grupu que nun ta nel meyor momentu y que negocia la so venta.
Otru grupu que sonará ye Editorial Prensa Ibérica, editora de La Nueva España, y tamién del Regiò7, mientres que les demás cabeceres en catalán sobreviven en empreses de menor tamaño (la más destacable ye El Punt) que se busquen fórmules de collaboración pa competir (suplementos conxuntos y coses asina.
En cuantes a Galicia Hoxe, nun ye precisamente un gran negociu y dizse que vive gracies a la sovención. Edítalu la empresa de El Correo Gallego, vinculada a círculos empresariales del PP y comenten que esi venceyu ye lo que-y resta puxu ente los potenciales lectores en gallego. Sicasí, tamién ye cierto que l’usu del gallegu nes informaciones de los grandes diarios de la zona ye daqué que se fai con normalidá, y que, la prensa gallega ye de provincia más que de comunidá autónoma. De fechu, namás La Voz de Galicia tien presencia bultable en toa Galicia y ello con un númberu espectacular de ediciones comarcales.
Pa final, el Berria del País Vascu tamién vive de les sovenciones a la edición n’euskera. Nesti casu, el mayor problema ye el so indisimuláu venceyu a un nacionalismu radical y minoritariu que-y resta llectores nun mercáu potencial entá ruino como ye’l de los alfabetizaos n’euskera. Sicasí, aguanta.
La conclusión de too esto, pa mín, nun ye otra que un diariu n’asturianu ye posible. D’una parte, ta la esperiencia de Les Noticies, que lleva más d’una década na cai, dalgo que nun se llogró nel País Vascu cuando, recién fechu oficial l’euskera, el Gobiernu autonómicu emperróse en sacar alantre un selmanariu qu’acabó marafundiando perres ensin resultau normalizador nengún. D’otra manera, el fechu de que se fale d’un grupu d’ambitu estatal quier dicir que la estructura ye la lóxica: pequeña, con una redacción contenida y imprentación nuna planta del grupu, o esternalizada (como la gran mayoría de les cabeceres d’anguaño). Tiraes d’ocho mil exemplares pa vender seis mil, por exemplu, munchu trabayu comercial, sovenciones (como toos les tienen)… y ehí tienes un periodiquín que tire p’alantre. Haya suerte.
Nel coche tengo programao Radio Sele nel númberu tres del autorradio. Ente Radio Asturias y Radio 3. Suelo sentila cuando voi pela ‘Y’ y munches veces pienso nel enfotu que-y vienen poniendo dende va tantu tiempu Xuanxu Mariño, Meli Fernández, y tola xente que colabora con ellos. Dende Xulio Vixil a Xaviel Vilareyo. Enforma Sacabera, les retresmisiones del Uviéu (un fútbol nun me da más, pero faenlo perguapo)…
Pa mín, sentir Radio Sele ye como un recordatoriu de que ye posible, de que la llingua de nueso tien que tener futuru. Porque sí, por constancia, pol enfotu de los sos falantes. Radio Sele ye un recordatoriu de que tamos ehí 24 hores al día los 365 díes del año, anque seya al traviés del discu duru nel que Xuanxo y Neli programen hores de radio fórmula.
Radio Sele ye, coles sos limitaciones, un exemplu en munchos sentíos. Y quería reconocé-yoslo, como oyente fiel. Porque cuesta munchu siguir ehí, con tolo que pasó, y con tolo que pasa. Dalgúa día, Radio Sele tamién sedrá oficial, anque seya por mor de años de pleitu.
Dos medios electrónicos, Libertad Digital y e-noticies, fainse eco estos díes d’una ablucante polémica al rodiu d’una carta al direutor de La Vanguardia. La cosa ye que nel programa de la TV3 que conduz Julia Otero (No em ratllis! / ¡Nun me ralles!) ficieron un esperimentu con un garrapiellu guaḥes sobre’l so conocimientu del himnu catalán Els Segadors. El casu ye qu’al final, la presentadora y los rapacinos acaben cantando cola manu nel corazón, como nes películes.
La escena abultó-y gafienta a una espectadora qu’escribió una carta de protesta al diariu mencionáu, molesta porque nun ficieren el mesmu esperimentu col himnu español, y considerando la cosa una muestra d’atroctinamientu nacionalista y tal.
La verdá, la estampa de guaḥes cantando himnos nacionales cola manu en pechu dióme siempre perceguera… pero la cosa nun diría a más si nun fuera porque nesti casu s’opón, pola parte de los ‘non nacionalistes’ (nomatu col que-yos presta llamase a los nacionalistes españoles), l’himnu d’una comunidá autónoma al del estáu. Hai munchu enfotáu nesa España suañada y falsa, castellana de fala, flamenca ya imperial. Y esi enfotu de so, a la fin, sedrá’l qu’acabe frañando España. ¿Daveres-yos paez ‘sensato’ esa zuna que-yos entró coles polítiques de proteición de les llingües minoritaries? Voi poner radio Sele.
Depués de lleer los análisis electorales que faen Rafa Palacios y Faustino Zapico nel Les Noticies de güei, nun paez tan difícil dalgo asina. Apurrimos el nuesu granín d’arena con un cutre bocetu de logo. 😉
