Perdióse l’enllaz
Category: Mundu
Priísmu
Hai una película de Cantinflas, nun recuerdo’l títulu, na qu’el célebre actor tien un diálogu nel que hai una muyer esmolecía porque cree que nun va ver crecer al so fíu y diz:
-Ay, ya no voy a saber qué votará cuando sea mayor!!
A lo que Cantinflas-y retruca:
-¿Pues a qué va a ser?… al PRI.
Pasaron como cuarenta años dende que Mario Moreno fixera aquella película pa qu’el Partíu Revolucionariu Institucional dexara’l gobiernu de Méxicu, y fízolu pa dexalu en manes del PAN (dalgo asina como’l PP d’equí, pero a lo mexicanu). Llueu llegaríen nueves presidenciales col PRD a puntu de ganar les elecciones, pero yá yera muncho pal ‘stablishment’ mexicanu, pal gringu y por estensión pal européu, tener a un izquierdista como López Obrador na presidencia. (La campaña pa desacreditar y nun desplicar nos medios internacionales a esti partíu, única referencia potente de la izquierda mexicana, foi otra historia que nun cabe equí).
El caso ye que cuido que, o muncho se mueve la cosa, o n’Asturies tamos nel camín d’atopanos un día col chiste de Cantinflas. Funcionarios y prexubilaos cautivos yá tenemos enforma, control mediáticu tamién, una marca política averada a un pasáu lexendariu de fazañes obreres escontra los permalos burgueses, curones y fartones, tamién. Namás mos falta que pase el tiempu.
Manifa
Viva el Perú, ¡Carajo!
Una de músiques, que diba tiempu que nun-y echábamos un güeyu al youtube. Equí vos dexo un videu del grupu peruanu Uchpa. Rock y blues en quechua. Pa más información lleéi la Uiquipedia.
Votez Bové!!
Entamó güei la campaña pa les eleiciones presidenciales franceses. Viva la República. Porque nun ye namás que en Francia la xente puea votar y escoyer al so xefe d’Estáu, amás ye que hai un códigu pa que, pente la campaña, tolos candidatos tengan les mesmes oportunidaes, no que seya posible.
Ello ye, los espacios de propaganda nos medios de comunicación públicos han ser los mesmos pa caún de los dolce candidatos. Y tolos medios han facer malabares pa nun favorecer a un candidatu pente los demás. Ello ye: al menos, sobre’l papel, democracia. Lluéu de xuru que Ségolène Royal y Nicolas Sarkozy van poder pagase más espacios propagandísticos nos medios privaos y la presencia de los candidatos pequenos va ser amenorgada d’alguna manera… Pero en principio, los franceses disimulen. Equí no, equí o tienes perres y bones relaciones col empresariau potente, o vas de culu, porque nin si quier se disimula.
A mín préstame la candidatura de Bové. Si fuera francés votaría-y. Creo. Siempre me paeció un paisanu, nun sé. Los suyos tan faciendo n’esti tiempu una campaña n’internet coordinada nes webs Unis avec Bove, Votez Bové y José Bové 2007, que paez la oficial. Nelles, la xente va apurriendo los sos propios banners, cartelos y materiales de campaña que-yos peta. A ver que tal-yos va, porque eso de la propaganda ‘llibre’ ye daqué qu’equí entá nun lo vi trabayar enforma.
José Luis de Jesús Miranda
Esti home d’enrriba ye ‘l ‘doctor apóstol’ José Luis de Jesús Miranda, alias ‘Jesucristo Hombre’, ‘Anticristo’, ‘Presidente Mundial de la Gracia’ o ‘Papi’. Ye un nota portorriqueñu al que se-y atribúi un pasáu de drogues y cárcele al que un día metióse-y en cuerpu el mesmu Xesucristu (dizlo él nuna entrevista que-y ficieron na NBC d’Estaos Xuníos que anda pel youtube). Dende entós, predica pel mundu que cuantayá que nun hai pecaos, que toos quedaren redimíos dende que se crucificare a Xesús, que toos a chumar, a calcala y a metese farlopa (dizlo él tamién nun reportaxe de la televisión colombiana que tamién anda pel yoputube). Interpreta ‘graciosamente’ la Biblia pa convidar, como podéis ver calcando equí, a tolos alloriaos que-y siguen a tatuase un 666 o les tres ‘s’ (SSS) na mandrecha o na tiesta, ya que son l’Anticristu pa toes eses ‘relixiones mentiroses’ que namás quieren mete-y mieu a la xente col pecáu y eses coses.
Esti llibertador, a mediu camín ente Hugo Chávez y Inri Cristo, ye tan buenu tan buenu, que namás cobra’l diezmu a les sos oveyes, sicasí acepta de con grau regalinos como coches, títulos d’empreses y mansiones perende (tamién lo reconoz nel reportaxe de la NBC). Y ello nun-y esmolez un res porque, como yá nun hai pecaos.
El doctor apostol, Jesucristo Hombre, cunta que son alrodiu de 100.000 los alloriaos que-y siguen, pero diz tamién que nun se para a cuntalos tolos díes. N’España tien ya abiertos dellos ‘centros educacionales’ en Madrid y Barcelona, y trabaya con Telegracia (una canal vía satélite) y Netgracia (tv pel internet), amás d’emisores de radio pel mundu.
Esti, llega a nacer en Texas y ye presidente d’Estaos Uníos de fixo.
Too esto, podría tomase a coña si nun fuera por coses como esta: neños.
Hometown Baghdad
Quiciaves dalgunos yá la conocéis. ‘Hometown Baghdad‘ ye una videu-log, miniserie documental o como lu queráis llamar, na que un grupu de mozos de la capital iraquí graben les sos inquietudes y esmolecimientos pa cunta-yles al mundu. El proyeutu ta empobináu por la productora neoyorquina Chat the planet, qu’apurrió-yos a los protagonistes tol material al través de productores audivisuales iraquíes.
Les ganes que tienen de colar del país, la pena pola marcha d’un collaciu o los problemes d’un país enllamargáu na guerra son dellos de los asuntos que s’amuesen na retafila videos que cuelguen cada llunes.
El fechu de que falen toos a les cámeres n’inglés, que seyan universitarios, que vivan en xalés, fai pensar que son toos de clase ‘acomodada’, pero la verdá ye que val pa facete una idea de lo que ye anguaño aquel país. El que sepa dalgo d’inglés nun va tener problema pa entendelos…. ¡falenlo como nosotros!
Nesti videu, Saif, un estudiante de 22 años, atópase con qu’el so gobiernu nun-y da’l títulu de dentista nun siendo que se comprometa a permanecer nel país trés años. Dilema.
Meyor con ‘motitas’
Yá lo dicía Arguiñano: meyor con ‘motitas’. La multinacional bananera ‘Chiquita’ ta en crisis depués de reconocer que financió a grupos paramilitares en Colombia. Los comedores de bananes d’esti país ablucaron cola anuncia, que venía a confirmar lo que, paez, yá se dixera bien de vegaes enantes. Na so web chiquita.com, la compañía diz que sí, que-yos pagó a los paramilitares, pero que foi namás pa protexer a los sos trabayaores ¿? Coses que tien el mundu.
Pillow fighters, el deporte
Toi acabante de descubrir un deporte perguapu: pelees d’almuhades. Nueches de cerveza y fumu, dos moces nel ring, un par d’almuhades, y a entamala.
L’inventu paez que vien de Canadá, y ya tien bien d’adeptos nos Estaos Xuníos, que pa esto del entertainment son mui agradecíos. Hai una lliga oficial, con una esbilla de lluchadores con nomes tan prestosos como Eiffel Power, Trashley, Polly Esther, Sarah Bellum o Digi Jones.
A manzorga tais viendo a Champain, anguaño campeona del mundu d’esti deporte tan guapu. Esta misma nueche, en New York City, va tener que defender el títulu énte Betty Clocker (a mandrecha, y de xuru que l’ambiente va ser de lo meyor. Champain fuma y bebe, tien 27 años y ye fía d’una pareya de moteros. Gusten-y les películes de mieu y kung-fu. D’otra banda, Betty Clocker diz de sí mesma que ‘llucha como una chica, y fai pastelinos como la to ma’. Nun fuma, pero presta-y dar al vasu, y gusta-y el pop de los 80. La caña.
Estes dos moces, ehí les tenéis, son la elite del Pillow fighting. La pena ye qu’entá esti deporte nun tien una presencia mundial, magar que yá ta empobinándose una versión europea (peme que n’Holanda).
La PFL (Pillow Fight League) ta abierta a la incorporación de lluchadores nueves. Tienen que ser ‘cool’, célebres y vivir na redolada de Toronto. Asina que, si dalguna s’anima, pue apuntase na web de la lliga. Yá tenemos un Asturiano na lliga de llucha llibre circense mexicana, por qué no una rapaza ‘cool’ y célebre na lliga d’almuhades d’América. Como siempre digo, too ye ponese.
Habrá quien diga que too esto ye un show pa calentorros, al estilo de les pelees nel barru. Pues sí, pero acaso el tenis ¿nun se sigue pa ver como se-y ximielguen les tetes a la Kournikova? o ¿nun ye’l fútbol una pasarela de modelos?, o les propies federaciones ¿nun roblaron cuantayá la mengua de les ropes de les xugadores de volley?. La llucha d’almuhades, ye la sinceridá fecha deporte.
Si vos peta ver una esbilla de combates (el desendolcu de la pelea ente Wynn Cognito y Vic Payback, por exemplu, podéis facelo darréu.
Cristo vive (en Brasil)
Nestos tiempos nos que l’Arzobispu d’Uviéu llama a sínodo, atopámonos con que Cristo vive en Brasil y faise llamar Inri Cristo. La reencarnación del Mesías (diz que él mesmu se lo tien creyíu) yá ye una estrella televisiva con miles de seguidores (dellos porque-y creen, dellos porque s’escarcaxen a cada vegada que sal na tele). El caso ye que pel youtube ya cuerren bien de videos coles sos apariciones, los sos sermones. Hasta un milagru que pues ver darréu.