Rodiles en peligru

Nun sé si sentirieis daqué del tema, pero merez la pena. Resulta que con esti afán que-yos dio a los gobierninos costeros polos puertos deportivos ¿deportivos?, nun va quedar veleru que nun tenga au amarrar a menos de tres milles de costa. Esta febre veleril ta algamando casique un puntu patolóxicu, autorizando obres que nun soi quien a entender. La última ye la de facer cais pa quinientos veleros en Villaviciosa, y pa que entren seliquino a amarrar los de los veleritos, van tener que dragar la barra Rodiles. D’esta manera, acábase cola ola que molestala navegación adulces de los del puertu ¿deportivo? y s’acabó. ¿Qué problema hai? varios. D’una parte, el ambiental. La ola ta ehí por que ta, y puntu. El cambeu de les corrientes de la mar nun ye inocuo, afeuta a la costa y al ecosistema. Pero nesti casu, amás, da la casualidá que la ola que tanta zuna-ys da a los deportistes del puertu ye una de les meyores d’Asturies pa surfear. Y cuido, porque ente los mios amigos cuento a dellos surferos, que esi, polo menos, ye un deporte.
Problemes similares, tamién pola mor de puertos ¿deportivos? diéronse yá n’otres zones del Cantábricu. Y con resultaos llamentables. Equí yá tenemos la que van armar en Xivares col Muselón y l’ampliación de la cementera d’Aboño. Munchu POLA, munchu Paraísu Natural, pero’l caso ye qu’equí caún fai lo que-y peta al que tien más perres.

Encamiento a quien llea esto que eche un gabitu a la iniciativa de la Federación Asturiana de Surf, firmando nel so escritu de protesta.

Esi asturiano!!

ASTURIANO

Siempre me prestó a esgaya la llucha llibre circense, fui un fan de Pressing Catch y prestaríame enforma dir a los combates de Rey Misterio y el irlandés del maquelele de la WWE en Madrid y Barcelona. Pero toi acabante de descubrir al mio nuevu ídolu de la llucha: Asturiano. Ye un maestru coles llaves acrobátiques como vais poder ver na esbilla de videos que vien darréu.

Sigui lleendo Esi asturiano!!

Rabinos antisionistes

Conocedor de la simpleza xeneralizada nos medios de comunicación, Irán empobinó estos díes un congresu que bien pudiera entitulase ‘L’holocaustu, ¿mitu o, cago’n mi mantu, va ser verdá?’. Lo cierto ye que esta ablucante ‘asamblea de majaras’ foi un ésitu. L’unicu fin que tenía yera’l de facer esa semeya, que tol mundu vería, na que un par de rabinos antisionistes amosaban pegatines escontra l’estau d’Israel. L’impactu foi l’esperáu: un iconu del xudaísmu recalcitrante n’alderique nun país que-y niega al estau d’Israel la llexitimidá pa esistir.

El gobiernu d’Ahmadineyad quiso xestionar en favor de so el tópicu, esi viciu que tamién mos fai ver a Irán como quieren que lu veamos. Pasaron díes, hasta qu’ún de los mios corresponsales favoritos de la prensa española, Henrique Cymerman, mos dixera quién son esos rabinos (failo güei en La Vanguardia).
Pero lo cierto ye que Irán nun ye un país de xabaces que namás quieren desaniciar el mundu infiel, nin Israel ye un inventu pa esterminar palestinos. España renunció, desanició dafechu, a los xudíos, y con ello perdio munchu, munchu. Quiciaves anguañu pudiera tar sonando nos 40 Principales versos en ladino con ritmos dub, a lo Matisyahu.

Ver el vídeu en Youtube

Arguyu billingüe (Somos chinos ¿non? #1)

Pailin Rattanasangsatian (WhaWha), y Supachaya Lattisophonkul (Bell) son les ‘China Dolls’, una pareya vocal tailandesa pa teenagers asiáticos que fai de la so condición billingüe un elementu pal ésitu. El so primer bombazu foi’l cantar en tailandés Muay Ni Kha (Soi china), nel que facíen gala de la so condición de minoría étnica (magar que privilexada) en Tailandia, y que depués foi tornáu al mandarín.  Nos sos discos amiesten cantares en mandarín y en tailandés, lo que-yos fexo ser abondo conocíes en China, Singapur o Malasia.

Ver el vídeu en Youtube

Alloriante conciertu en Pyongyang

Posiblemente, esti ye ún de los más pavorosos videos que cuerren pel youtube. Ye un conciertu del grupu surcoreanu ‘Shinhwa’ en Pyongyang, cuido que nun d’esos festivales de xermandía coreana empobinaos dende va unos cinco años polos gobiernos del Norte y el Sur de Corea, col enfotu inicial d’averar postures y, al tiempu, permitir restrinxíos realcuentros ente families separtaes dende la guerra entrambos llaos del paralelu 38.

El caso ye que dende entós sucédense, pesie a les tensiones y distensiones, eventos d’intercambiu baxo’l lema d’una corea xunía (al fondu l’escenariu relluma la silueta la península). Sicasí, como s’amuesa nel videu, la distancia entrambes corees ye entá abismal.

https://www.youtube.com/watch?v=QM1avYwLC6I