Category: Política

El post-franquismu (que non los nostálxicos del xeneralísimu) ya tien quien lo represente n’Asturies. Ta acabante de presentase l’agrupación asturiana de Ciudadanos, formación qu’en Catalunya algamó tres poltrones nel Parlament por mor de la campaña que-yos fizo El Mundo y La Razón, y qu’acabó por fundir al PP de Piqué.

Lo de post-franquismu nun ye porque sí. Ye lo que son, o polo menos ye lo qu’evidencien les sos declaraciones primeres n’Asturies. Nun son el post-franquismu nel sén de “cantri, reliyon” d’aquella dómina nacionalcatólica. Son el post-franquismu del economato, les barriaes de ‘productores’ (que non obreros) y del ‘nun te meter en política’.

Se presentaron en porrica (ver cartelu d’enriba) y nun se-ys pue negar la sinceridá. Son un partíu ensin ideoloxía (n’Asturies ya hai delles candidatures ‘independientes’ con esi mesmu apueste), que se presenten como estremaos d’una clas política fartona y corrupta (que bien sabemos equí que la hai).

Pero mira tú, que la so sinceridá nun me conquista. La so presentación foi tamién el momentu nel que anuncien que nun van defender la oficialidá porque nun ven “demanda social” pa ello (dizlo El Comercio), y bien ye que lo espresen d’esa manera, porque evidencia que nada se pue esperar d’ellos. ¿Acaso si hubiere demanda social pala independencia d’Asturies diben defendela? ¿Defenderán la continuidá de la FSA nel Gobiernu asturianu, a la vista de qu’hai demanda social pa ello?

Probe arranque el de esta formación que confiesa trenta afiliaos n’Asturies, y nel que se define como un partíu qu’ellabora programes a guelpe de sondeos d’opinión (¿qué sondeos?). Sicasí, de xuru qu’arrampuñarán dellos votos de quienes nunca nun voten y d’esi PP zarzuelero qu’apigaza n’Asturies.

Quiero ser sociata, como esti rapazón d’enriba. Quiero ganame la vida cómodamente y nun esmoleceme por que la mitá d’Asturies seya funcionaria o prexubilada o por quetengamos la mesma población que va 40 años. Nun quiero que m’esmoleza que la renta asturiana tea los sos finxos nes sovenciones estatales o europees, o qu’el PIB tea allancáu en comparanza col d’otros territorios europeos. Nun quiero esmoleceme por que la emigración mozo supere a la inmigración. Nun quiero pensar más en si Asturies ta desenfocada, vista namás como una parte de un too al que se supedita. Nun quiero nin siquier preocupame por conocer la mio cultura, curiala y puxar por ella. Quiero escaeceme de lo poco que sé d’asturianu y d’Asturies. Quiero vivir tranquilu, coime.

Quiero entrar na secta. Quiero enfotame en Areces, Javier Fernández y Alvaro Cuesta. Quiero lluchar por que la FSA tenga dacuando un ministru. Quiero tar énte’l PP, tar argullosu de que un 25% de los asturianos mos den el gobiernín pa que así podamos trabayar pa los de nueso y asina colocame en dalgún puestín nes conseyeríes: si soi inútil perdíu, nun gabinete de prensa; si soi fatu, a facer como que carreto papeles, dame igual. Y quién sabe si, cuando seya mayor, acabo nun conseyu d’alministración gracies al bon xacíu nes relaciones ente sindicatos y FADE que propicia’l partíu.

Quiero que me preste la programación de la TPA y dir tolos años a Rodiezmo, y dicir pela cai que Pacita Felgueroso ye más guapa y gayaspera que Henry. Quiero tar a gustu, atopame nesta tierrina de sidra y fabes, de santina y bravos mineros. Quiero vivir en Felizonia.

¿Qué zuna-yos dió con facer exhibiciones militares n’Asturies? D’un tiempu p’acá tuviemos el circu de la Guardia Civil (paezme que na plaza de toros d’Uviéu), desfiles y desembarcos nel sable de San Lorenzo en Xixón y agora dicen que tan preparando otra amuesa de poderíu de les fuerces aeronáutiques españoles na mesma playa. ¿Nun hai más sitios onde los facer? o ye que ¿hai dalgún interés especial en que seya n’Asturies onde se pongan a los militares n’amuesa?

Nun sé, pero ye que nun m’alcuerdo de que’n tola mio vida (que ye más o menos dende que morrió Pachu) se diera enfotu talo n’ablucar al personal col poderíu militar n’Asturies. ¿Ye que equí somos especialmente receptivos? o ¿ye que se vio la necesidá d’espoxigar ciertu enfotu patrióticu nesti territoriu?

Puede sonar a paranoicu, pero sí que d’un tiempu p’acá toi viendo enfotos empobinaos a reforzar la concencia nacional española, en cuenta quiciaves de la que’l gobiernu de Zapateru tien montada col tema del estatutu catalán y la negociación con ETA. Cuido que’l razonamiento ye: si nos tachen de frañar España y de antipatriotes, vamos demostrar que nun ye asina. ¿Y cómo lo faen? Pues con detallucos tan discretos como los de camudar la firma de la publicidá institucional (si antes una anuncia de la DGT o del Ministeriu de Medio Ambiente finaba col nome de la DGT o de talu ministeriu, agora failo con ‘Gobierno de España’), o sacando a los militares a la cai. Y ehí tamos. Aplaudiendo alardes de fuerza y recordando que, pesie a too, somos españoles.