González&González – Páxina 50

Piesllamos… Ximiélgame.net

Dende llueu, esti nun ye’l mensaxe que mos hubiera prestao escribir al quintu día de funcionamientu de Ximielgame.net, pero cuidamos que ye lo meyor.

Suponemos que los más perspicaces blogosferos asturianos vos decataríeis de la llamentable coincidencia de que dos proyeutos idénticos, casique coles mesmes funcionalidaes, asoleyáronse al empar el pasáu martes. Nós, cuidamos que nun ye lo meyor pa que un sitiu d’esti tipu tenga un bon nivel d’usu que convivan o compitan dos sitios pensaos pa una comunidá tan ruinuca como la nuestra.

A la hora d’entamar Ximiélgame nun mos movíen intereses económicos nin de ego, sinon el presto de desenvolver una ferramienta que, al nuesu entender, ye perguapa p’afitar les rellaciones ente los blogueros d’Asturies.

Per embargu, les coses nun salieron bien. El día (meyor dicho, la nueche, del llunes) na que tábemos faciendo los últimos axustes a Ximiélgame, probando enllaces y demás, mos enteramos de que otra xente tuvo la mesma idea (orixinales, cierto ye, nun somos). Al traviés d’un corréu, desplicaben qu’habíen atopáu el dominiu y mos ofrecíen ‘axuntar esfuercios’ pa desendolcar el proyeutu de forma conxunta. Al tiempu, nos informaben de que teníen rexistráu la direición esbilla.net, direición que, lóxicamente, visitamos. Per embargu, nun había un res, y al poco vimos qu’acababen d’instalar Pligg (la ferramienta cola que furrula tamién Ximiélgame) y al poco qu’entamaben la traducción del sistema del inglés al asturianu.

Nesi puntu, lo reconocemos, pecamos de ‘malpensaos’. Nun-y dimos credibilidá a la invitación a ‘axuntar esfuercios’ y entendimos que aquel enfotu en asoleyar un sitiu mínimamente operativu (se pue facer en poques hores) convertía l’ofrecimientu inicial en papel moyáu. Asina qu’adelantamos unes hores l’apertura de Ximiélgame.

Sicasí, al día siguiente punxímonos en contautu cola xente d’Esbilla pa tratar d’esclariar l’asuntu, cola idea de que comprenderíen qu’aquella situación nun tenía xacíu, que yera lóxico que nun aparáramos un proyeutu nel que llevábemos cerca de dos meses trabayando, y que de toles maneres bien podíen axuntase a nós cola alministración de Ximiélgame, al tiempu que nós collaboraríemos con ellos nel desendolcu d’otros proyeutos.

Pero nun pudo ser. La nuesa ‘premura’ nel asoleyamientu de Ximiélgame foi interpretada como una forma de desconfianza qu’existió (polo ya espuesto enriba), y que llamentamos fondamente.

Asina, y énte la perspectiva d’atopanos con dos proyeutos iguales, o mui asemeyaos, compitiendo nuna comunidá tan pequeña como la nuesa, pensamos que lo meyor ye dexar sitiu, asumir nuestru error, y pedir disculpes fonderes a la trentena d’usuarios que se rexistraron estos díes. Tamién queremos agradecer, y muncho, los mensaxes recibidos tres de l’apertura de Ximiélgame, y a toa esa xente que corrió a poner el so enllaz nel so blogue o na so web, y mui especialmente a Nireblog. A toos, vos encamentamos a facer lo propio con Esbilla.net, pa que haiga un sitiu de promoción de noticies n’asturianu que tenga un bon nivel d’usu, que sirva pa cohesionar a la comunidá, y que seya ún de los puntos de referencia del internet n’ast.

Ximiélgame.net siguirá funcionando entá unos díes. Depués, se procederá al so pieslle, qu’incluirá l’esborráu de tolos datos qu’apurrieron los usuarios nestos díes de funcionamientu, tales como nomatos, claves, direiciones IP y, por supuestu, señes de corréu electrónicu. Vémonos.

Presentamos… Ximiélgame.net

González y González Webrothers tien el presto de presentavos Ximiélgame.net, un proyeutu nel que venimos trabayando dende va ya unes selmanes y que naguamos por que vos preste a toos tantu como a nosotros mos prestó desenvolvelu y ponelu a la vuesa disposición.

Como ya vos imaxinaréis la mayoría, trátase d’una adaptación de Menéame a la comunidá asturiana n’internet. Poro, ye un sitiu nel que ye esa comunidá la que vota (ximielga) les noticies y hestories que los usuarios unvíen. Va cásique too. Cualisquier noticia que seya d’interés, podéis apurrila a la comunidá al traviés de Ximiélgame. Llueu, sedrá la xente la que diga si-yos interesa, o si queda pa prau. Que vos preste.

Perimportante

Esta vuelta ye especialmente perimportante. Tenemos que poner toos el güevu énte la reforma l’estatutu. Ta claro, nun pue haber dubia, que la FSA y el PP acabarán amagostando la reforma ente ellos. Poro, ye importante que sepan que van tener que tomar en cuenta la opinión de muncha xente capaz de movilizase, d’enllenar Asturies de cartelos, pegatines o banderes desixendo la oficialidá del idioma. Tien que se notar la opinión de quien cree que sí ye importante preservar, curiar y puxar pol asturianu. Tenemos que mete-yos na cabeza que, si caltienen les sos posiciones testerones de refugu, despreciu y belixerancia contra l’asturianu, a lo meyor tan poniéndose a la escontra d’una más que bultable parte de la sociedá asturiana a la que dicen representar.

Quiciaves tamos nun momentu malo, especialmente malo. Nun momentu nel que los resultaos electorales nun foron afayadizos pal asturianismu (magar que más de 82.000 asturianos votaran a formaciones que llevaren espresamente nel so programa la oficialidá de la llingua), y nel que les engarradielles son, quiciaves más que n’anteriores resaques electorales, la principal actividá del asturianismu. Muncha perda d’enerxía que namás val pa entretener a personaxes siniestros (que non d’esquierdes) como’l Lastra o el Javierito Fernandez.

Por eso tenemos que facer qu’esti cursu políticu qu’entama seya’l de la reivindicación llingüística. Con merchandising, con banderes escolingaes de les ventanes, con pegatines y cartelos nos coches, con mensaxes en tolos foros nos que seya posible (nun falo d’internet espresamente), con una monumental manifestación esti 24 payares que más que una manifestación seya toa una cabalgata, con tol espectáculu que seya posible, con personaxes conocíos que presten la so reconocencia, con música, con charangues y bandes de gaites, con xente mazcarao, con fueos artificiales, con majorettes y carroces… nun sé… con too. Tien que ser la de coyer.

Yo, apúntome.

Llega Asturies d’Or

Llega Asturies d’Or. Ún de los coleutivos asturianos del lladrillu, la Confederación Asturiana de la Construcción, diz na prensa que quier un ‘pautu’ (¿con quién?) pa alquitranar la costa y facer ‘segundes residencies’ por tolo que ye’l litoral asturianu.

Siendo esti un coleutivu tan esmolecíu pol bien d’Asturies, nun hai por qué pensar mal. De xuru que nun-yos mueve l’animu de ganar perres a manplén, sinon llevantar el país, como yá lo tienen fecho en Cantabria.

Sedría pa tomalo a chanza si nun fuera esti un tema serio. Ta muncho en xuegu y nun ye plan d’andar con bromes. Esta xente, a la vista de la recesión, quier pautos. Y ello tien pelugru. Y muncho. Dir a Cantabria, que ye l’exemplu pa esta xente, da pena y dolor. Duelmu pola vida dir a Castro Urdiales, enantes una de les villes mas guapes de tol Cantábricu. Qué dicir de Suances, o de toes ese güeries que había ente Santander y Torlavega.

Entá, n’Asturies, tamos a tiempu de que l’exemplu de Llanes, Lluancu o Caravia nun s’esparda. Muros ta tocáu de muerte, l’oriente nun digo, y per A Veiga, Castropol o Tapia yá s’esfroten les manes pensando no que ta por aportar pela autopista. Miéu. Munchu miéu.

Quiero ser sociata

Quiero ser sociata, como esti rapazón d’enriba. Quiero ganame la vida cómodamente y nun esmoleceme por que la mitá d’Asturies seya funcionaria o prexubilada o por quetengamos la mesma población que va 40 años. Nun quiero que m’esmoleza que la renta asturiana tea los sos finxos nes sovenciones estatales o europees, o qu’el PIB tea allancáu en comparanza col d’otros territorios europeos. Nun quiero esmoleceme por que la emigración mozo supere a la inmigración. Nun quiero pensar más en si Asturies ta desenfocada, vista namás como una parte de un too al que se supedita. Nun quiero nin siquier preocupame por conocer la mio cultura, curiala y puxar por ella. Quiero escaeceme de lo poco que sé d’asturianu y d’Asturies. Quiero vivir tranquilu, coime.

Quiero entrar na secta. Quiero enfotame en Areces, Javier Fernández y Alvaro Cuesta. Quiero lluchar por que la FSA tenga dacuando un ministru. Quiero tar énte’l PP, tar argullosu de que un 25% de los asturianos mos den el gobiernín pa que así podamos trabayar pa los de nueso y asina colocame en dalgún puestín nes conseyeríes: si soi inútil perdíu, nun gabinete de prensa; si soi fatu, a facer como que carreto papeles, dame igual. Y quién sabe si, cuando seya mayor, acabo nun conseyu d’alministración gracies al bon xacíu nes relaciones ente sindicatos y FADE que propicia’l partíu.

Quiero que me preste la programación de la TPA y dir tolos años a Rodiezmo, y dicir pela cai que Pacita Felgueroso ye más guapa y gayaspera que Henry. Quiero tar a gustu, atopame nesta tierrina de sidra y fabes, de santina y bravos mineros. Quiero vivir en Felizonia.

Wellcome to Asturland!

Haz nada falamos del amestáu de les amériques y güei nes carreteres asturianes podíemos ver esto…

Suelo viaxar bastante y cuando vas pol País Vascu o por Galicia, ves los cartelos llumosos de la carretera un castellanu y en vascu, o gallegu, ye entos cuando dices que pena que n’Asturies entá nun hai oficialidá. Pero coimes, resulta que’l inglés nun ye oficial, entos… ¿por qué nun tan los cartelos tamién n’asturianu?. Val entos dirán que ye pa la gran masa de turístes estranxeros, que gracies a les maraviyoses polítiques de la FSA vienen a conocer Asturies. Val, paezme una idea prestosa, pero nun ye un poco absurdo que los anglófonos que vienen a conocer Asturies tengan derechu a ver los cartelos n’inglés y que los que vivimos, y contribuimos pa que se paguen esos cartelos, y falamos asturianu nun podamos disfrutar d’esi derechu. Definitivamente n’Asturies somos mui raros…

L’amestáu de les amériques

Llámame muncho l’atención el fenómenu del spanglish, esi amestáu d’español y inglés que desenvolvieron los latinos y fíos d’inmigrantes hispanos nos Estaos Uníos. Ye un fenómenu que dalgunos, como la filóloga asturiana de la Universidá de Nueva York y escritora, Paquita Suárez Coalla, consideren mui asemeyáu al del amestáu d’español y asturianu, esi tan de nueso. A la fin, trátase del ‘amiestu’ más o menos sistemáticu de les dos llingües na fala d’asturfalantes (o castellanohablantes) o de los sos fíos, col español (o el inglés).

Sigui lleendo L’amestáu de les amériques

Militares n’amuesa

¿Qué zuna-yos dió con facer exhibiciones militares n’Asturies? D’un tiempu p’acá tuviemos el circu de la Guardia Civil (paezme que na plaza de toros d’Uviéu), desfiles y desembarcos nel sable de San Lorenzo en Xixón y agora dicen que tan preparando otra amuesa de poderíu de les fuerces aeronáutiques españoles na mesma playa. ¿Nun hai más sitios onde los facer? o ye que ¿hai dalgún interés especial en que seya n’Asturies onde se pongan a los militares n’amuesa?

Nun sé, pero ye que nun m’alcuerdo de que’n tola mio vida (que ye más o menos dende que morrió Pachu) se diera enfotu talo n’ablucar al personal col poderíu militar n’Asturies. ¿Ye que equí somos especialmente receptivos? o ¿ye que se vio la necesidá d’espoxigar ciertu enfotu patrióticu nesti territoriu?

Puede sonar a paranoicu, pero sí que d’un tiempu p’acá toi viendo enfotos empobinaos a reforzar la concencia nacional española, en cuenta quiciaves de la que’l gobiernu de Zapateru tien montada col tema del estatutu catalán y la negociación con ETA. Cuido que’l razonamiento ye: si nos tachen de frañar España y de antipatriotes, vamos demostrar que nun ye asina. ¿Y cómo lo faen? Pues con detallucos tan discretos como los de camudar la firma de la publicidá institucional (si antes una anuncia de la DGT o del Ministeriu de Medio Ambiente finaba col nome de la DGT o de talu ministeriu, agora failo con ‘Gobierno de España’), o sacando a los militares a la cai. Y ehí tamos. Aplaudiendo alardes de fuerza y recordando que, pesie a too, somos españoles.

L’omertá

Paez que col asuntu esti de los reis y su prole El Jueves y Anasagasti rompieron el xuramentu d’omertá, esi pautu atribuyíu a la mafia, la camorra o la ‘ndrangheta calabresa nel que s’afita la fidelidá a la ‘famiglia’. “Non vedo, non sento e non parlo” (Nun veo, nun siento y nun falo) diz la máxima.

Agora que Anasagasti diz lo que diz nel so blog, porque se siente llibre pa facelo, móntase la que se monta. Dalgunos diarios piden que lu procesen (que lu fusilen, pidirían va unos años), otros le recuerdan el pautu de silenciu. Ye’l casu del PSOE, esi partíu gayasperu onde los hubiere: “Son unas palabras desmedidas, sin sentido y espero que rectifique”, diz el cabezaleru socialista José Blanco. “Máximo respeto por la Familia Real”, continuó. “Considero que su trabajo y su actuación es muy positiva para España y el interés general de los españoles y me parece que han sido un despropósito las expresiones que ha vertido Anasagasti”.

Y too eso, sin que nenguna publicación asoleyara entá les trescripciones de les conversaciones telefóniques íntimes y gochones ente l’heriede de la corona y la so amante, como yá ocurriera n’otros llaos. En fin… puxa el Principado.

Anasagasti fan club

Iñaki Anasagasti, esi clásicu del parlamentu español, ta acabante de montala bien gorda por decir les coses como xente abondo les piensa, como de xuru que les diría nun chigre ente culín y culín colos collacios, o ente ‘pote’ y ‘pote’ (entiéndase pote nel sentíu vascu, el del poteo o txikiteo).

Y armóse. Armóse demostrando que lo que diz nel blog ye la verdá nidia: que pa colos reis bromes nenguna y a poder ser llambiotaes.

De toles maneres, ye perinteresante lo que pasa con Anasagasti. Porque lo que diz, dizlo nel so blog personal, y non nuna rueda de prensa, nin nos corredores parlamentarios, nin una columna nel Deia. Dizlo nun llugar nel que lo públicu y lo privao nun paez tar mui bien xebrao. Un blog ye personal, y suel lleelu un grupu de xente mui determinao. Nun ye un mediu de comunicación de mases… pero sí ta al algame de cásique cualisquier persona.

Eses peculiaridaes tán detrás de que Anasagasti se soltara la guedeya y se sintiera llibre pa dicir lo que piensa. Y bienveníu seya’l blog por eso, qu’apurre al políticu a dicir qué quier, cómo lo quier, y que-y paez el mundu que mos rodea. Quiciaves, tamién por eso, los blogs políticos nun furrulen como deberíen. Fálta-yos sinceridá, como verdadera canal de comunicación y rellación ente’l votante y el políticu, un políticu que se sincera, pese a quien-y pese. Pero hai que ser valiente pa ser sinceru. Nun vaya ser que se t’espurran les idees y acabes fadiando al xefe de turnu.

Anasagasti: tuelf points.