Llegó’l Nadal, y toos tamos felices y enllenos d’ilusión porque vamos gastanos el nuesu salariu (y más) nos grandes centros comerciales que pueblan España. Y por supuesto la tele, fiel reflexu de la sociedá na que enxamas viviremos, llenase de folclóriques, y tou tipu de cantantes casposos que diviertennos con villancicos tradicionales de Castiella y Andalucía. Pos bien de toos esos cantantes güei presentovos al más prestosu. A esfrutalo…
Va tiempu que’l revisionismu histórico ta de moda. La cosa esa de la lley de Memoria Histórica paez-yos a munchos que va nesi sen, y nun dubien en desenterrar a les sos propies momies, enllenando les llibreríes d’una bayura testos ¿d’historia?, daqué inédito dende los tiempos de la muerte de Pachu. Xente como César Vidal o Pio Moa anecia n’afirmar que ‘los rojos’ y los masones tracamundiaron la historia d’España a mou. Qu’España va españar y que, pa crímenes de guerra, los de Paracuellos. Puestos a desenterrar cadabres, ellos prefieren desenterrar la momia del Ricardo de la Cierva, un Grandisimu Historiador, el Historiadorísimu autor de llibros de títulu tan ecuánime como “No nos robarán la historia”, tan esclarecedores como “El 18 de julio no fue un golpe militar fascista” o tan fiables como “La masonería invisible; una investigación por internet”.
Sicasí, esti fenómenu nun ye esclusivu d’una derecha política que s’afaya na necesidá de salir a la defensa de la xunidá d’España y los sos valores cristianos y familiares. D’otra banda, n’Asturies entamaron va tiempu a considerar al Conseyu Soberano d’Asturies y Lleón un finxu del nacionalismu astur, y a Belarmino Tomás un nuevu Pelayo republicanu.
El caso ye que, ¿qué más da que seya mentira?, lo importante ye crear posu. Qué más da qu’el País Vasco nunca nun fuera un país, nin siquiera embaxu’l reinu de Navarra. Lo importante ye que, anguaño, una parte perimportante de los vascos piensen que sí que son un país, magar que la so historia nacional tea enllena de mentires. D’otra manera, ¿la historia oficial d’España acaso nun ta fecha a la midida d’un determinau pensamientu políticu? Yo entá recuérdome de cómo m’esplicaben la Reconquista, que m’imaxinaba a Pelayo vestíu con camiseta bermeya y calzonciellu azul, asoleyando la rojigualda énte una cuadriella de moros invasores.
Hispania yá perdió Portugal, yá valió de tanto separatismu, que de seguir así, con tantu vascu, tantu catalán y tantu moro, nun mos va quedar historia que cuntar.
Conocedor de la simpleza xeneralizada nos medios de comunicación, Irán empobinó estos díes un congresu que bien pudiera entitulase ‘L’holocaustu, ¿mitu o, cago’n mi mantu, va ser verdá?’. Lo cierto ye que esta ablucante ‘asamblea de majaras’ foi un ésitu. L’unicu fin que tenía yera’l de facer esa semeya, que tol mundu vería, na que un par de rabinos antisionistes amosaban pegatines escontra l’estau d’Israel. L’impactu foi l’esperáu: un iconu del xudaísmu recalcitrante n’alderique nun país que-y niega al estau d’Israel la llexitimidá pa esistir.
El gobiernu d’Ahmadineyad quiso xestionar en favor de so el tópicu, esi viciu que tamién mos fai ver a Irán como quieren que lu veamos. Pasaron díes, hasta qu’ún de los mios corresponsales favoritos de la prensa española, Henrique Cymerman, mos dixera quién son esos rabinos (failo güei en La Vanguardia).
Pero lo cierto ye que Irán nun ye un país de xabaces que namás quieren desaniciar el mundu infiel, nin Israel ye un inventu pa esterminar palestinos. España renunció, desanició dafechu, a los xudíos, y con ello perdio munchu, munchu. Quiciaves anguañu pudiera tar sonando nos 40 Principales versos en ladino con ritmos dub, a lo Matisyahu.
Si Molvanîa cunta colos éxitos de Zlad “Elektronik Supersonik” y “I am the Anti-Pope” y el país asiáticu Phaic Tӑn cola serie televisiva Hospital of the Hearts, del país cientruamericánu San Sombrèro vien Juan Suavez y su ¡¡BABABUMBA!!… toos a mover el culu…
A estes altures tol mundu conoz la Wikipedia, la enciclopedia llibre que tien versiones en más de doscientos idiomes (incluyíu l’asturianu). Lo que quiciabes nun sía tan conocíu ye’l software qu’usa esti xigantescu repositoriu del saber humanu, MediaWiki.
Pos bien, los que me conoceis bien sabeis por qué llevo un mes llargu ensin dormir apenes, y ye que pal desarrollu d’ún d’esos proyeutos que van acabar cola mio salú física (la metal perdila hai tiempu yá), decidíme por esti software pal desendolcu del mesmu. Lo que yo consideraba un mui bon software como wikipedista que soi, nun roza nin de cerca el potencial que MediaWiki tien. Y ye que, yá non sólo como “Sysop” (que nun ye más qu’un usuariu con pequeños privilexos), sinon xugando con esti software como alministrador del sistema, permitióme descubrir tol pontencial del mesmu.
Pa facevos un pequeñu resumen, agora mesmu tengo furrulando nel mio servidor de desarrollu un portal nel que cuerren cinco instalaciones de MediaWiki, una pal asturianu, otra pal castellanu, otra pal inglés y otra pal francés, y la quinta ye un repositoriu multimedia que comparte les semeyes, sones y demás multimedios con toles versiones anteriores. Anque suene a una cosa complicadísima ye d’asustar lo cenciellu que resulta montar una “Wiki Family”, como ye conocíu esti tipu d’instalaciones, y ye que namás hai que camudar unes poques variables nel ficheru de configuración de cada wiki. Nun toi diciendo con esto qu’un usuariu común seya capaz a facelo, pero cualisquier programador con un mínimo de conocimientos nun tardaría más de 20 minutos en montar el sistema (con links d’interwiki y too).
En fin, qu’amás del proyeutu de la Wikipedia, con tola importancia que tien en multitú d’aspeutos sociales, culturales, etc… la fundación MediaWiki consiguió un software tan versatil que ye perfeutamente valido pa otros proyeutos… y nun quiero precisamente montar un wiki…
Espero que cuando pase el tiempu y me quite un pocu de trabayu d’encima pueda facer un artículu téunicu pa desplicar los pasos que seguí pa llevar a bon puertu el proyeutu (anque entá nun finé, falta personalizar el diseñu y más cosines).
Pailin Rattanasangsatian (WhaWha), y Supachaya Lattisophonkul (Bell) son les ‘China Dolls’, una pareya vocal tailandesa pa teenagers asiáticos que fai de la so condición billingüe un elementu pal ésitu. El so primer bombazu foi’l cantar en tailandés Muay Ni Kha (Soi china), nel que facíen gala de la so condición de minoría étnica (magar que privilexada) en Tailandia, y que depués foi tornáu al mandarín. Nos sos discos amiesten cantares en mandarín y en tailandés, lo que-yos fexo ser abondo conocíes en China, Singapur o Malasia.
La cobertura que-y dieron a la mani pola oficialidá nos trés diarios asturianos ye pa detenese un momentu. Talamente paez que los responsables d’estos periódicos saben más d’otra cosa que de periodismu. Vamos equí facer un breve analís, n’alcordanza tamién d’aquella estupenda seición del auténticu CQC, qu’en gloria tea.
Naide nun lo pue negar, la manifestación del CAO güei n’Uvieu foi un ésitu total, magar que munchos nun pudimos tar ellí. 15.000 persones diz el CAO, 10.000 la policía local uvieína… dame igual. Depués de trenta años, a una o dos manis añales pola oficialidá, lo que ta pernidio ye que ésta sí ye una ‘clara demanda social’ de los asturianos. Toi contentu, y arguyosu de sentir a muncha, muncha xente bien cerca.
Queríos Javier Fernández, Tini Areces, Fernando Lastra, Ovidio Sánchez, señores del Ridea, Javier Neira, Vilda d’Alarcos, y a tolos cerriles que perhí anden entá… n’esti momentu d’allegría pa gran parte de los asturianos, dexaime que vos dedique una canción…
https://www.youtube.com/watch?v=CiIlYz2n4Pg
Nun ye ñoña, tien coña, 😉
Va unos meses qu’entamó les sos emisiones la TPA. Magar la pila perres invertíes nella, la canal pública asturiana de televisión nun algamó entá un índiz d’audiencia más allá del 3% del share mediu diariu. ¿Qué falla? Crítiques tien habío abondes dende l’entamu les emisiones. La falta del usu de la llingua asturiana nes emisiones ye una d’elles. Pero la otra, la razón fondera de la pobretaya audiencia de la TPA ye la falta d’asturianidá de los sos conteníos. Los resultaos paez que concuerden con eses crítiques. Un humorista madrilanu de medio pelo, que nin conoz nin siente la idiosincrasia asturiana, nun pue aspirar a que-y rían les gracies como si fuera Jerónimo Granda, Cellero o El Maestru, por poner un exemplu. D’otra manera, un presentador amenorgáu, rescatáu de la emisora de la Ser en la llocalidá de Madrid, nun pue metese a cocineru chisposu ensin esperar un fracasu rotundu. ¿Qué pasa entós? ¿Cuál ye la solución? Ta nidio: recurrir al ‘asturian star system’.