Cuando en 1986 obligaron a Iron Maiden a facer playback pa un programa de la televisón alemana, esta foi la so rempuesta…
La ‘espezculación’ fae presos políticos
Na Uiquipedia defínese ‘presu políticu’ como “persona física a la que se caltién na cárcele o embaxo arrestu por mor de que les sos idees puean suponer una amenaza pal sistema políticu afitáu na sociedá a la que pertenez”.
Juan Manuel Martínez Morala y Cándido González Carnero son dos presos políticos. Quiciás, los primeros presos políticos d’Asturies en trenta años. El so ingresu na prisión de Villabona, con un recursu entá pendiente de resolución, nun ye más que la última fase de la carrera que dende les alministraciones públiques asturianes se caltién dende va años contra un sindicatu: la CSI, y contra dos de los sos principales cabezaleros: Cándido y Morala.
Pudiéramos recordar equí lo que yá escribiéramos de la traxectoria de dambos dos va unos meses. De cómo la CSI, namás la CSI, aneció en que Naval Gijón nun echara’l pieslle y cayera en manes de la piqueta pa dexar pasu a esi urbanismu hortera del sable y el ‘espeZtacular’ Acuariu de Poniente que tanto-yos presta, paez, a la ‘izquierda plural’ playa.
CSI ye un sindicatu de clase, y nos 25 años que lleva de llucha pola defensa de los derechos de los trabayadores nunca nun dexó de selo pa convertise en academia de cursinos nin en trampolín políticu. Esa llínia ye la que taba esgonciando, permuncho, un pergrande negociu inmobiliariu que dalgunos presentaben como ‘el normal crecimiento urbanístico de la ciudad ante instalaciones industriales ya obsoletas’.
Nun hai argumentos que valgan pa defender el pieslle de los astilleros de Xixón. Nun los hai. Porque la industria naval sigui furrulando’n toa Europa. Porque nun val falar de la competencia asiática cuando n’Alemania se optó por reorientar la construcción naval pa caltener activu esi texíu industrial ufiertando proyeutos especializaos y de altísima calidá que sirvan de motor pa nueves industries de alto conteníu teunolóxicu.
Pero esi apueste, defendíu pola CSI, requier muncho trabayu y una inversión que tardaría años en devolver beneficios. Demasiaos años pa quien considera preferible el dineru rápido del lladrillu de luxu. Ye más fácil cargase la resistencia sindical a golpe de talonario, de prexubilaciones o de traslados forzosos a Ucrania, que apostar pol riesgu d’adaptar una industria emblemática a les circunstancies nueves d’un mundu nel que la globalización entamóse na mar.
Namás que por eso, y non porque se frayara un caxetín d’una cámara de tráficu nunes movilizaciones sindicales, ye polo que Cándido y Morala tan na cárcele. Polo que hai presos políticos n’Asturies del sieglu XXI.
Emeá canta
Va tiempu que conozo esti maraviosu videu de 1984. Emeá (o Mister T, según pa quién), canta con mensaxe. ‘Nun hai naide como la to má, asina que trátala bien’, diz. Impagable, una auténtica ayalga cultural.
Va un pitu? (publicidá)
Perdióse l’enllaz
La Fundación Felatio delibera
El xuráu del premiu al llabor solidariu del añu axuntóse güei na pensión La Cuentista pa entamar les desliberaciones sobre a quién-y dan esti añu el galardón. Como ye vezu, la Fundación Felatio quier reconocer con esti premiu lo munchu que se fizo d’un tiempu p’acá pa con los probes. Suenen como favoritos el magnate siderúrxicu Luismi Metal y el cantante melódicu David Hasselhoff. La ceremonia d’entrega de premios va dase nel Teatru Condemor.
(Na imaxe, ceremonis de entrega del galardón del añu pasáu).
Esperances
Na película d’Almodóvar ‘Laflor de mi secreto’, el personaxe de Marisa Paredes, depués d’aferrase a cualisquier detalle pa caltener esperances de siguir al lláu del so home (Imanol Arias) pesie a que él nun y fai casu nengún, acaba por entruga-y: ‘¿Existe alguna posibilidad, por pequeña que sea, de salvar lo nuestro?’. Él y responde llueu y firme: ‘Non, nenguna’.
L’asturianismu ye como’l personax de Marisa Paredes. Enfótase nun amor imposible que-y da de lláu una y otra vegada. Nun hai esperanza pa ella, magar que ella nun lo ve… pero la realidá ye testerona.
La realidá ye que l’asturianismu nun ye quién a facese ver, a amosase como una opción ‘sensata’ pa apurrir el so puntu de vista sobre’l mou d’enfocar el país. Y nun va ser quién a ello en munchu tiempu como nun se faiga una reflexón cola suficiente fondura. Hai que tomar aire. Parase un momentu a pensar por qué pasa lo que pasa y ufrir llueu respuestes a la xente. ¿Qué problemes esmolecen de verdá a los asturianos? ¿Qué ye lo que ofrez el nacionalismu pa resolver esos problemes? ¿Son soluciones posibles, averaes a la rialidá social, económica y cultural del país, y al tiempu estremaes de les del PSOE, PP o IU, o meros ‘brindis al sol’ y declaraciones d’intenciones que nun aguantes el primer asaltu de ‘realpolitik’, que ye lo que manda?
Sicasí, esperances hailes. Echando una güeyada a lo que hai n’otros países del nuesu entorno vense procesos de reconversión del nacionalismu, procesos que permitieron a esta corriente afitase como una fuercia social y política bultable. El caso gallego habría de ser un exemplu p’Asturies por bien dellos motivos. Magar que mos lleven sesenta años de ventaxa, el procesu de tresformación del nacionalismu nuna fuercia relevante féxose de trenta años p’acá, pero se fizo.
N’Andalucía, l’andalucismo tien tamién una traxectoria histórica relevante dende Blas Infante, pero ensin llegar tener el pesu de los nacionalismos gallegu o canariu, y munchu menos el catalán (lléase ‘paísos…’) o vascu, tien anguañu una base social importante dende la qu’entamen a construir un nacionalismu d’izquierdes y superar una crisis orixinada por guerres personalistes, fundamentalmente.
N’Aragón, el rexonalismu más o menos ranciu del PAR enfréntase de tú a tú cola Chunta Aragonesista, una opción que a base de renunciar al nacionalismu (defínese federalista) y d’amosase como una forma nueva d’entender la esquierda n’Aragón (con un cabezaleru de renome y prestixu, como Labordeta), acabó por desaniciar prácticamente del mapa políticu aragonés a Izquierda Unida.
L’exemplu aragonés (y en cierta midida l’andaluz) foron, quiciaves, l’espeyu nel que se miró la nuesa Izquierda Xunida pa entamar un xiro nes sos posiciones y tratar de fagocitar el discursu nacionalista n’Asturies. Yera supervivencia, pero tevo consecuencies, y tamos viéndoles agora, pola rocea de los comunistes a que prime el discursu asturianista-socialista énte la esencia comunista de la formación.
El caso ye que dalgo hai que cambiar. Izquierda Unida tendrá que componese, y fadrálo nestos cuatro años de xuru. PAS, Unidá, AA y quien seya, tamién… pero lo que ta claro ye que nun ye cosa d’axuntase sin más. Hai que ufrir dalgo a la sociedá, y tien que ser nuevu, serio y capaz, y amás, paecelo. Y toos tendremos que poner el güevu… nun val dicir y quedar en casa.
Ganó’l PRI
Nun se podía esperar otra cosa. Siendo realistes. Entá nun tamos tan maduros n’Asturies como pa cambiar el votu como fixeron en Méxicu, y ellí costó-yos cásique setenta años. Asturies ye un país avieyáu, nel que la mayoría la xente entá vota pensando na Guerra Civil y los maquis, que son socialistes como del Sporting, hasta la muerte, y aunque tea en segunda ‘regional’. Asina, nun se pue esperar un cambiu, un vuelcu electoral curiosu, y menos cuando les coses tan como tan ente la COPE y la Ser.
Lo que sí tien más miga ye la ‘burbuxa’, esa especie de país microscópicu en dentro d’un país minúsculu que ye l’asturianismu. Estes elecciones, pesie a lo que digan munchos, nun son de fracasu. Y nun lo son porque naide podía esperar otra cosa… salvo quienes confiaronlo too a la carta Uras-Pas. La cosa ye que tamos como tábamos, anque con un mínimu d’esperanza si de verdá hai ganes de facer daqué. Y voi desplicame darréu…
Fake d’IU
El PKD nun ye un fake
Priísmu
Hai una película de Cantinflas, nun recuerdo’l títulu, na qu’el célebre actor tien un diálogu nel que hai una muyer esmolecía porque cree que nun va ver crecer al so fíu y diz:
-Ay, ya no voy a saber qué votará cuando sea mayor!!
A lo que Cantinflas-y retruca:
-¿Pues a qué va a ser?… al PRI.
Pasaron como cuarenta años dende que Mario Moreno fixera aquella película pa qu’el Partíu Revolucionariu Institucional dexara’l gobiernu de Méxicu, y fízolu pa dexalu en manes del PAN (dalgo asina como’l PP d’equí, pero a lo mexicanu). Llueu llegaríen nueves presidenciales col PRD a puntu de ganar les elecciones, pero yá yera muncho pal ‘stablishment’ mexicanu, pal gringu y por estensión pal européu, tener a un izquierdista como López Obrador na presidencia. (La campaña pa desacreditar y nun desplicar nos medios internacionales a esti partíu, única referencia potente de la izquierda mexicana, foi otra historia que nun cabe equí).
El caso ye que cuido que, o muncho se mueve la cosa, o n’Asturies tamos nel camín d’atopanos un día col chiste de Cantinflas. Funcionarios y prexubilaos cautivos yá tenemos enforma, control mediáticu tamién, una marca política averada a un pasáu lexendariu de fazañes obreres escontra los permalos burgueses, curones y fartones, tamién. Namás mos falta que pase el tiempu.